Virðingarleysi við vinnu allra - og hvað skal þá gera?

Það má lesa í Morgunblaðinu fyrri hluta þessarar setningar sem ég set hér á pistilinn.

Já, ég tek undir að það er komin tími til að alþingi kveði upp úr með það sem að Geir Haarde snýr.

Það væri alþingi til betrunar og upplyftingar ef þar yrði samþykkt að falla frá ákæru á Geir Haarde.

Málið var á sínum tíma lagt upp með að minnst fjórir aðilar sætu fyrir rannsóknarnefnd og þá væri hægt að greina í sundur aðdragandann að hruninu og með því reynt að læra eitthvað af óförum þjóðarinnar.

Það er ekki hægt að slíta í sundur aðgerðir einstakra manna (athafnamanna!!) og annarra í þjóðfélaginu.

Allir leggja eitthvað í sameiginlega vitund og aðgerðir, sem svo leiðir af sér hrakfarir, vegna þess að gæði athafnanna voru ekki á hærra stigi en raun ber vitni.

Nú er lag að ljúka þessu máli á stórmannlegum nótum og sýkna Geir. 

 

 

 

 

 

 

Lesið þessa grein hér.

Menn gapa í undrun yfir undarlegri uppákomu hjá FME

Nú hefur gengið yfir þjóðina furðulegt mál, þar sem Gunnar Andersen forstjóri FME er aðalmaðurinn.

Honum skal vikið úr embætti, hvorki meira né minna!

Þessi myndarlegi maður hefur komið fyrir sjónir sem einn þeirra sem sé réttur maður á réttum stað. En í stað þess að hann festist í sessi, þá kemur stjórn FME og vill manninn burt.

Nú geta utanaðkomandi ekki séð alla fleti svona máls, en einhver lykt eða réttara sagt fnykur er í loftinu!

Í Morgunblaðinu í dag er áhugaverð grein sem ég beini athygli fólks að. Hana má lesa hér.

Þar segir Bragi Leifur Hauksson frá sinni sýn og niðurstaða hans er: "Ekki er örgrannt um að sú hugsun leiti á að stjórn Fjármálaeftirlitsins ætti að segja af sér, svo skipa megi aðra sem stendur þétt við bak forstjóra." 

Hér er ekkert lítið mál á ferðinni og ég hvet fólk til að kynna sér það betur með því að lesa grein Braga í heild sinni.

Konudagurinn og blómagjafir

Í dag komu margir fjölskyldumeðlimir í heimsókn til að taka forskot á bolludaginn.

Einhver hafði á orði að ég hefði ekki gefið konu minni blóm í tilefni konudagsins.

Þá sagði ég:

Ég hef veitt þessari konu ást mína og aðdáun og ómælda virðingu í næstum 50 ár. Öll heimsins blóm geta ekki komið í staðinn fyrir þá gjöf og ég held að hún myndi ekki vilja skipta á því atlæti og blómagjöf!

 

 

 

 

 

 

 

 

 

 En hér er blómvöndur sem ég tileinka eiginkonunni! 

Samkynhneigðir eru ekki undirsettir almennri reglu

Fyrir nokkrum árum voru samkynhneigðir ekki ánægðir með þá umgjörð og aðbúnað sem þeim var búin hér á Íslandi.

Þeir hafa samt nú undanfarið notið skilnings og fengið réttindi fram úr því sem viðgengst víða um lönd.

Fyrir nokkrum áratugum voru samkynhneigðir í felum með sínar kenndir, en nú er blaðinu snúið algjörlega við og þeir njóta allra réttinda. Hvernig stendur á því að það nægði ekki svo að allir væru ánægðir.

Sannleikurinn er nefnilega sá að margir samkynhneigðir létu sér ekki nægja að fá að ganga í staðfesta sambúð. Þeir vildu meira.

Þeir vildu ganga í hjónaband - hvorki meira né minna. Einnig það fengu þeir framgengt.  Af hverju þurfti að nefna þetta sambúðarform hjónaband, sem slíkt fólk tekur upp. Af hverju ekki að vera sátt við að sambandið héti staðfest samvist.

Var ekki staðfest samvist eðlilegasta niðurstaðan, þegar sambúðin var ekki til að halda utan um samlíf karls og konu og þeirra afkvæmi.

Svo tel ég og margir fleiri að hefði verið eðlilegasta niðurstaðan.

Ísafjörður ægifagur - falleg ljóðabók Matthíasar Kristinssonar

Mig langar til að þakka fyrir fallega litla ljóðabók frá Ísafirði. Vestfirska forlagið gefur hana út og hefur lagt mikinn metnað í bókarkápuna. Ljóðin eru eftir Matthías Kristinsson, sem er kunnur Ísfirðingur.

Kápa bókarinnar er algjört gersemi. Hana prýðir stórkostleg mynd þar sem fegurð Ísafjarðar skartar öllu því sem til er í náttúrudýrð.

 

 

 

 

 

 

Forsíðan og pollurinn eins og í æfintýramynd

 

 

 

 

 

 

 

Baksíðan sýnir fjallið Ernir ásamt Ísafjarðarkirkju

Upphafsljóðið í bókinni heitir Skutulsfjörður og er fallegur óður til Ísafjarðar, alls tólf vísur í einu kvæði. Þar kemur fram kærleikur Matthíasar til heimahaganna.

Ég tek mér það bessaleyfi að birta hér fyrstu hendinguna úr upphafsljóðinu.

Ísafjörður ægifagur,
um þig leikur dýrðardagur,
logn á Polli, logn til fjalla,
leikur sól um Gleiðarhjalla.
Prestabugt með gullnar gárur
geymir sínar freyðibárur.

Ég hvet alla velunnara Ísafjarðar og Matthíasar til að eignast þessa bók. Hún er hugljúf og vermir hjartað og fegurðarskynið.

"Geir Haarde verður sýknaður"

Reyndur bankamaður Ragnar Önundarson skrifar grein í Morgunblaðið í dag; "Engar áhyggjur, Geir Haarde verður sýknaður".

Mig langar til að benda á þessa grein, sem má lesa hér.

Flest sem Ragnar dregur fram hefur nú þegar sést frá ýmsum áttum, enda margir sem eru felmtri slegnir yfir þessum réttarhöldum yfir Geir Haarde. Þau lýsa furðulegri ásökunaráráttu og þörf til að hengja einhvern - helst þann sem ekki hefur valdið glæpnum!

Það sem er lofsvert við þessa grein umfram annað sem fram hefur komið um mál þetta, er hin góða lýsing á framtaki Geirs og hans ríkisstjórnar á hinum krítísku augnablikum þegar bankarnir hrundu.

Björgunin sem þá var framkvæmd er nú notað sem kennslugagn fyrir hið alþjóðlega fjármálakerfi.

 

 

 

 

 

 

 

 

 

Geir Haarde verður sýknaður segir Ragnar Önundarson í grein dagsins

Ofurfæða í blandarann!

Ég fékk í jólagjöf forláta blandara, sem hefur breytt og bætt mína
möguleika með alveg nýrri vídd í matargerð. 

Eins og við vitum þá er ósoðin fæða með miklu verðmætari
næringarefnum. Suðan deyfir og eyðir fjölda nauðsynlegra
vítamína og snefilefna, en með því að fara í gegnum blandarann
er hægt að innbyrða bráðholla fæðu á alveg nýjan hátt!

 

 

Blandarinn gefur mikla möguleika til að framreiða

mjög holla fæðu sem ella myndi aldrei lenda í okkar

maga, alla vega ekki ósoðið eins og hér á sér stað.

Þær tegundir sem standa undir því að kallast ofurfæða

eru: Rauðrófur, engiferrót og spínat - allt ósoðið.

Hér hefur verið tekið til það magn sem skera skal niður.

Innihald fyrir 3 glös:

1 glas vatn         sett í blandarann í upphafi

1 til 2 gulrætur, eftir smekk

1 biti engiferrót, eftir smekk

1 biti rauðrófa, eftir smekk

2 bitar blómkál, eftir smekk

Spínat, eftir smekk

Kókósmjólk, 1/3 úr dós

Rísmjólk, 1/3 úr glasi (smáskvetta)

Döðlur, 5 stk til að gera ljúfara á bragðið

Allt saxað niður og sett í blandarann og látið mixa. 

Gott á bragðið og bráðhollt!

Kennsla barna og fullorðinna og hrunið mikla

Í Fréttablaðinu í dag er grein eftir Sighvat Björgvinsson fyrrverandi ráðherra "Að fermast upp á Faðirvorið". Sjá greinina hér.

Þessi tímabæra grein fjallar um spurninguna "Hvað þarf til að kenna börnum að lesa", og þar segir Sighvatur að vandi grunnskólakerfisins stafi ekki af menntunarskorti kennara.

Það tek ég heilshugar undir!

Ég er einn þeirra, sem lærði að lesa undir handarjaðri Björgvins Sighvatssonar föður Sighvats, og minnist með hlýju þeirrar kennslu sem mér var veitt í Barnaskóla Ísafjarðar.

Frá þeim tíma hef ég getað lesið um allt milli himins og jarðar.

Hins vegar hef ég verið mjög hugsi yfir viðhorfum langskólagenginna viðskipta- og hagfræðimenntaðra manna ásamt mönnum úr fleiri fræðigreinum, sé út í það farið. 

Einhverntíma heyrði ég sagt að siðferðisviðmið ætti ekki heima í viðskiptafræðum! Allt væri þetta svo fastmótað, svona svipað og margföldunartaflan!

Kennarar töldu ekki í sínum verkahring að kenna siðferðisreglur, aðeins að fræða um hinar ýmsu leiðir til að verða fær í viðskiptum.

Með þannig hugsunarhátt fór fólk út í lífið eftir langa skólagöngu. Þá var undir hælin lagt hvort viðkomandi fræðimaður myndi þróast til betri eða verri vegar. Hvort menn yrðu landi og þjóð og sjálfum sér til heilla á alla lund.

Við erum nú orðin töluvert reyndari í þessum efnum eftir hrunið og efnahags æfintýrin sem reyndust engin heillaspor. Þar voru fræðimenn úr þessum geira sem spiluðu stórt hlutverk.

Það sem við getum alla vega lært af hruninu er það, að fræðimennska ein og sér skilar okkur engum happafeng ef siðferðisviðmið eru ekki fullburða í viðkomandi fólki.

Lífsreglur sem við getum haft gagn af!

Mér berast oft gagnlegar upplýsingar og nú vil ég deila því með ykkur sem rak á fjörur mínar í dag.
          
Heilbrigði:
  

1. Drekktu mikið vatn.
2. Borðaðu morgunmat eins og kóngur, hádegismat eins og prins og kvöldmat eins og fátæklingur.
3. Borðaðu meira af mat sem vex á trjám og plöntum og minna af þeim sem framleiddur er í verksmiðjum.
4. Taktu mið af þremum L-um: Lífskrafti, Lífsgleði, Lífsfærni (að geta sett sig í annarra spor). 
5. Taktu frá tíma til að iðka hugleiðslu, hreyfingu og bænir.
6. Eigðu glaðar stundir.
7. Lestu fleiri bækur en síðasta ár.
8. Vertu í hvíld og friðsemd minnst 10 mínútur á dag.
9. Sofðu í 7 tíma (eða lengur).
10. Farðu í 10 - 30 mínútna göngutúr á hverjum degi... og meðan á göngu stendur - brostu              

Íhugaðu eftirfarandi:

11. Ekki líkja lífi þínu við líf annarra. Þú veist enganveginn hvað þeirra ferð útheimtir.
12. Gæt þess að hafna neikvæðum hugsunum. Veldu heldur að vera jákvæður.
13. Ekki yfirkeyra þig. Hafðu gát á takmörkunum þínum.
14. Taktu þig ekki allt of hátíðlega, það gerir engin annar.
15. Ekki eyða tíma þínum í munnmælasögur eða slúður.
16. Lát þig dreyma meðan þú vakir, því það gerir þig frjóan.
17. Öfund er tímaþjófur. Þú hefur nú þegar allt sem þú þarfnast.
18. Ekki halda upp á vandamál fortíðarinnar. Ekki minna félaga þinn um hans feilspor. Það myndi einungis eyðileggja hamingju dagsins í dag.
19. Lífið er of stutt til að hata. Ekki hata nokkurn mann.
20. Stofnaðu til friðar við fortíðina, svo þú fáir notið núverandi stundar.
21. Það ber enginn ábyrgð á hamingju þinni, nema þú sjálfur!
22. Lífið er skóli og þú ert hér til að læra. Vandamálin eru aðeins viðfangsefni sem á að leysa. Árangur viðleitni þinnar er þinn ávinningur sem endast mun alla ævi.
23. Brostu meira og vertu glaður.
24. Þú þarft ekki að vinna hverja baráttu. Vertu heldur sammála um að vera ósammála. Haltu friðinn.
                                                                                                                                               
Fjölskyldan og þjóðin:
                                                                          

25. Hringu oftar til ættingja þinna.
26. Mundu að gera öðrum gott.
27. Fyrirgefðu fólki allt sem ber á milli.
28. Veittu þeim tíma þinn sem eru orðnir 70 ára eða meira og þeirra sem eru minna en 6 ára.
29. Reyndu að fá minnst þrjár manneskjur til að brosa á hverjum degi.
30. Það sem aðrir hugsa um þig er ekki þitt vandamál.
31. Atvinna þín gætir þín ekki þegar þú veikist, en vinir þínir munu halda sambandi við þig.                                                                           

Lífið:
                                                                          

32. Gerðu það sem rétt er!
33. Slepptu því sem er þér ekki til bóta eða gleði.
34. Guð heilar allt.
35. Það er sama hvort augnablikið er gott eða slæmt, það mun örugglega breytast.
36. Það er aukaatriði hvernig þér líður, þú skalt alltaf fara á fætur og ganga út í daginn.
37. Hið besta mögulega er enn ekki komið.
38. Þegar þú vaknar á morgnanna, þakkaðu þá Guði fyrir og einnig þegar þú ferð að sofa á kvöldin.
39. Þú ert glaður hið innra og sýndu það ávallt með brosi þínu.

 

Pútín vill að hver nemandi lesi 100 bækur

Ég var að enda við að lesa frétt í Sunnudags Mogga og að lestri loknum var ég mjög hrifinn af þessari uppástungu herra Pútíns.

Það sem þó kom mér til að vekja máls á þessu, var það að blaðamaðurinn Alexander Nasarjan að nafni þótti þessi tillaga hrollvekjandi, hvorki meira né minna.

Mér þykir miklu fremur að það væri þroskandi fyrir nemendur að lesa einhverjar góðar bókmenntir sér til fróðleiks og vaxtar,

Tillagan er aldeilis eftirtektarverð, þó svo vilji til að herra Pútín sé tillögusmiðurinn. Sérstaklega á okkar tímum þegar ungviðið (og hið eldra einnig) situr yfir tölvum og öðrum rafrænum tólum, og gefur sér engan tíma fyrir bókarlestur.

Þann fyrirvara vil ég auðvitað hafa, að ekki sé um að ræða einhver áróðursrit, heldur sé hér um að ræða uppbyggjandi og alþjóðlega viðurkenndar bókmenntir, sem segja má að séu vel metnar sem slíkar.

Hér má lesa greinina.