Útvarp Saga á rangri braut - orðin vettvangur æsingamanna

Saga kallar sig þjóðarútvarp og til að standa undir slíkri nafngift þurfa stjórnendur að setja sér skýr markmið.

Hér áður fyrr, þegar símalína var opinn til almennings, þá var það regla að ef innhringjandi færi yfir strikið (sem stjórnendur ákveða hvar er staðsett) þá var þegar í stað lokað fyrir samtalið.

Nú bregður svo við að til Útvarps Sögu hringja menn inn sem hafa það eitt til málanna að leggja að hvetja landsmenn til að koma á ákveðna staði og hafa með sér eitt og annað í farteskinu, sem getur orðið vopn og tjáningarmeðal fundarmanna.

Þar er talað um matvæli og einnig um þvag og þjóðfánann, til að geta gert þeim blessaða fána eitthvað til miska.

Fólk er að sturlast sem svona hagar sér. Það á ekki að eiga sér málsvara hjá neinum fréttamiðli.

Ég vil benda mönnum á að fara í fótspor Falun Gong og mótmæla friðsamlega og með virðingu. Slíkt hefur margföld jákvæð áhrif, en allt ofbeldi eykur á vandann, sem er ærinn fyrir.

Þó mikil og djúpstæð reiði sé í þjóðfélaginu, sem ég skil mæta vel, þá bið ég þjóðina að tjá sig með virðingu og á áhrifamikinn hátt. Það skilar margföldum árangri og allir standa beinir í baki eftir slíkar uppákomur.

 

 

Athugasemdir

[Benedikta E, 29.9.2010 kl. 13:18]

Sæll Sigurður - ég heyrði þetta viðtal sem þú ert að vitna í - ekki heyrði ég neitt minnst á "þvag" hlustaði ég þó á viðtalið til enda - eins var talað um íslenska fánann sem sameiningartákn þjóðatinnar ekki var það nú annað.

[Axel Jóhann Axelsson, 29.9.2010 kl. 13:39]

Pétur og símatími hans er orðinn einhver ógeðfelldasta útvarpsdagskrá, sem boðið hefur verið upp á í samanlagðri sögu ljósvakans.   Ofstæki stjórnandans smitast auðvitað út til hlutsenda og beinlínis kalla á að ofstækisfólk af ýmsu sauðahúsi hringi inn í þáttinn, enda yfirleitt vel tekið undir ofstækið af hálfu Péturs, sem jafnvel kyndir undir, finnist honum viðmælandinn full hógvær í málflutningi.

Hann má þó eiga það, að hann lagði til að viðmælandinn sem hvatti fólk til að mæta við Alþingi með vatnsbyssur, fylltar af hlandi, væri einungis með vatn í byssunum og léti duga að sprauta því yfir þingmenn.

[Benedikta E, 29.9.2010 kl. 13:59]

Nú það er bara svona Axel - þetta viðtal heyrði ég ekki - enda sit ég ekki við til að hlusta á útvarp Sögu - heyri bara eitt og eitt viðtal af og til.

[Gunnar Freyr Rúnarsson, 3.10.2010 kl. 06:02]

Ákvað reyndar að hætta að hlusta á þessa stöð, þegar Guðmundur Ólafsson var látinn fara á sínum tíma.  Gafst svo upp á því, enda byrjaði hann fljótlega aftur hjá Sigurði G.  Féll svo aftur í ónáð hjá frá frú A.  Eftir að Sigurði G var sjálfum sagt upp fékk ég endanlega upp í kok. 

Auðvitað þurfa eigendur stöðvarinnar að hugsa sinn gang.

Það að kynda undir óeirðir er auðvitað ekki gott......